Sipas të dhënave paraprake të Komisionit Qendror të Zgjedhjeve, LVV renditet e para me 47.13 për qind të votave dhe 53 ulëse në Kuvend. Pas saj vijnë Partia Demokratike e Kosovës me 22 mandate dhe Lidhja Demokratike e Kosovës me 18 mandate.

Ky rezultat ka rikthyer diskutimin nëse vendi kishte nevojë të shkonte përsëri në zgjedhje, duke qenë se votimi i 7 qershorit prodhoi pothuajse të njëjtën panoramë si ai i 28 dhjetorit të vitit të kaluar. Vetëvendosje mbeti forca dominuese, ndërsa opozita nuk arriti të ndryshojë në mënyrë të ndjeshme raportin e forcave në Kuvend.

Pikërisht kjo ka hapur debatet se partitë opozitare, në vend të një procesi të ri zgjedhor me kosto politike dhe institucionale, mund të kishin kërkuar forma bashkëpunimi për zhbllokimin e institucioneve dhe shtyrjen përpara të proceseve shtetërore.

Në këtë sfond shtrohet dilema nëse zgjedhjet ishin një nevojë demokratike apo një proces që në fund dha pothuajse të njëjtin rezultat politik, pa prodhuar ndryshimin që prisnin shumë qytetarë.

Vuniqi: Zgjedhjet e reja nuk prodhuan një zhvendosje të rëndësishme të ekuilibrit politik në Kosovë

Për këtë çështje, opinionisti Agim Vuniqi tha për “Bota sot” se zgjedhjet e 7 qershorit nuk sollën lëvizje në skenën politike, ndaj sipas tij me të drejtë shtrohet pyetja pse vendi përfundoi në zgjedhje të jashtëzakonshme.

Sipas Vuniqit, zgjedhjet janë instrument demokratik, por mesazhi i dhënë nga qytetarët duhet lexuar si kërkesë për stabilitet dhe vazhdimësi.

“Për nga rezultati i deritanishëm, duket se zgjedhjet e reja nuk prodhuan një zhvendosje të rëndësishme të ekuilibrit politik në Kosovë. Nëse Lëvizja Vetëvendosje ka arritur të ruajë pothuajse të njëjtën mbështetje elektorale si në ciklin e kaluar, ndërsa partitë opozitare nuk kanë arritur të krijojnë një shumicë alternative, atëherë pyetja që shtrohet me të drejtë është nëse vendi fitoi diçka substanciale nga rikthimi në zgjedhje apo nëse u konsumua kohë e çmuar institucionale pa prodhuar ndryshim politik.

Në demokraci, zgjedhjet janë mjeti më legjitim për të matur vullnetin e qytetarëve, por ato nuk janë qëllim në vetvete. Nëse elektorati e ripohon në mënyrë të përafërt të njëjtën shpërndarje të besimit politik, atëherë mesazhi i qytetarëve mund të interpretohet si kërkesë për stabilitet dhe vazhdimësi, jo për përmbysje të raporteve ekzistuese”, deklaroi ai.

Vuniqi u ndal edhe te qëndrueshmëria elektorale e LVV-së në raport me partitë e tjera, duke vlerësuar se kjo lidhet me faktin se partia fituese ka ndërtuar një identitet të qartë politik.

Ai përmendi gjithashtu si element me peshë figurën e liderit Albin Kurti dhe mënyrën e tij të komunikimit politik.

“Një faktor tjetër i rëndësishëm është profili personal i liderit të saj, Albin Kurti. Pavarësisht kundërshtimeve politike ndaj tij, nuk mund të mohohet se ai ka zhvilluar një mënyrë komunikimi që në shumë raste rezulton më bindëse dhe më e strukturuar sesa ajo e kundërshtarëve të tij. Gjuha e tij politike, e mbështetur shpesh në argumentim dhe referenca intelektuale, i ka mundësuar të krijojë një raport të drejtpërdrejtë me shtresa të ndryshme të shoqërisë”.

Sa i përket opozitës, opinionisti vlerësoi se ajo nuk ka arritur të ofrojë një alternativë të qartë programore.

Sipas tij, mënyra si u paraqitën partitë opozitare i bëri ato të duken më shumë si rikthim te praktikat e së kaluarës sesa si një ofertë e re politike.

“Nga ana tjetër, opozita nuk duket se ka arritur të prodhojë një alternativë të qartë programore. Në vend të një debati të fokusuar mbi ekonominë, arsimin, shëndetësinë dhe reformat institucionale, shpesh është vërejtur mbizotërimi i retorikës emocionale, i sulmeve personale dhe i një patriotizmi që shumë qytetarë mund ta perceptojnë si më tepër reaktiv sesa vizionar. Kjo ka bërë që kundërshtarët e qeverisë të mos paraqiten si një ofertë e re politike, por më tepër si një rikthim tek praktikat e së kaluarës”, shtjelloi ai.

Më tej, Vuniqi tha se rezultati i këtyre zgjedhjeve hap pyetjen nëse krizat politike dhe bllokadat institucionale që çojnë në zgjedhje të shpeshta i shërbejnë interesit publik. Ai kërkoi që spektri politik të respektojë vullnetin e qytetarëve dhe ta përkthejë atë në stabilitet institucional.

“Në këtë kontekst, mund të argumentohet se zgjedhjet e fundit nuk sollën ndryshim real në skenën politike, por konfirmuan raportin ekzistues të forcave. Kjo nuk i bën ato të panevojshme, sepse në demokraci legjitimiteti rinovohet përmes votës. Megjithatë, rezultati ngre pyetjen nëse krizat politike dhe bllokadat institucionale që çojnë në zgjedhje të shpeshta i shërbejnë interesit publik, kur qytetarët në fund japin pothuajse të njëjtin verdikt.

Në një demokraci funksionale, kur zgjedhjet nuk ndryshojnë në mënyrë domethënëse vullnetin e sovranit, përgjegjësia bie mbi klasën politike që të lexojë mesazhin e qytetarëve dhe të mos e mbajë vendin peng të krizave të pafundme. Mandati i dhënë nga votuesit nuk është vetëm e drejtë për të qeverisur, por edhe detyrim për të ndërtuar institucione funksionale dhe për të siguruar vazhdimësinë e shtetit.

Prandaj, pyetja thelbësore nuk është nëse zgjedhjet ishin formale apo jo, por nëse spektri politik është i gatshëm ta pranojë verdiktin e qytetarëve dhe ta shndërrojë atë në stabilitet institucional. Nëse vullneti popullor ka mbetur pothuajse i pandryshuar, atëherë energjia politike do të duhej të zhvendosej nga përplasjet e pafundme drejt qeverisjes, reformave dhe interesit të përgjithshëm të Republikës së Kosovës”, përfundoi Agim Vuniqi për “Bota sot”.

Jakupi: Elektorati zgjodhi vazhdimësinë në vend të ndryshimit.

Në anën tjetër, analisti Zejnullah Jakupi deklaroi se zgjedhjet e 7 qershorit nuk sollën ndonjë ndryshim të madh në skenën politike, pasi rezultati i tyre doli i ngjashëm me atë të 28 dhjetorit të vitit të kaluar.

“Nëse një parti si Lëvizja Vetëvendosje arrin përsëri një rezultat shumë të ngjashëm me zgjedhjet e mëparshme dhe mbetet forca dominuese, mund të argumentohet se zgjedhjet nuk prodhuan një ndryshim të madh në raportet e forcave politike. Në këtë kuptim, opozita nuk arriti të bindë mjaftueshëm elektoratin se ofronte një alternativë që do të ndryshonte drejtimin politik të vendit. Kjo mund të interpretohet si një lloj konfirmimi i preferencës së votuesve për balancën ekzistuese”.

Megjithatë, në prononcimin e tij për “Bota sot”, Jakupi theksoi se zgjedhjet mbeten një proces demokratik dhe, edhe pse nuk ndryshuan pushtetin, ato e rikonfirmuan atë.

Ai foli edhe për mundësinë që partitë politike të shmangnin procesin zgjedhor të 7 qershorit, duke nënvizuar se edhe kur rezultati duket i parashikueshëm, zgjedhjet shërbejnë për të testuar mbështetjen publike.

“Megjithatë, nuk do të thosha se zgjedhjet ishin thjesht një proces formal. Në demokraci, edhe kur rezultati mbetet i ngjashëm, zgjedhjet kanë funksionin e ripërtëritjes së legjitimitetit politik. Votuesit nuk votojnë vetëm për të ndryshuar pushtetin; ata mund të votojnë edhe për ta konfirmuar atë. Nëse qytetarët patën mundësinë të zgjedhin dhe shumica përsëri mbështeti afërsisht të njëjtin konfigurim politik, kjo vetë është një zgjedhje politike me rëndësi.

Sa i përket pyetjes nëse zgjedhjet duhej të ishin shmangur për t’u fokusuar te puna institucionale, në një sistem demokratik zgjedhjet zakonisht mbahen kur e kërkojnë kushtetuta, ligji ose dinamika parlamentare. Argumenti për shmangien e zgjedhjeve mund të ketë logjikë nga këndvështrimi i efikasitetit administrativ dhe stabilitetit institucional, por ai përplaset me parimin që legjitimiteti i qeverisjes duhet të verifikohet periodikisht nga qytetarët. Edhe kur rezultati duket i parashikueshëm, procesi zgjedhor shërben për të testuar nëse mbështetja publike vazhdon të ekzistojë”.

Jakupi theksoi më tej se, edhe pse këto zgjedhje nuk prodhuan ndryshim, elektorati dha sinjal se preferon vazhdimësinë në vend të ndryshimit.

“Prandaj, mund të thuhet se: Zgjedhjet mund të mos kenë sjellë një ndryshim të madh në ekuilibrin politik. Opozita mund të mos ketë arritur të krijojë një alternativë mjaftueshëm bindëse për shumicën e votuesve. Por vetë fakti që rezultati mbeti i ngjashëm nuk i bën zgjedhjet të panevojshme ose thjesht formale; ai mund të tregojë se elektorati zgjodhi vazhdimësinë në vend të ndryshimit.

Vlerësimi varet nga këndvështrimi: mbështetësit e qeverisë do ta shohin rezultatin si konfirmim të kursit aktual, ndërsa kritikët mund ta interpretojnë si shenjë të mungesës së alternativave të forta politike”, shpjegoi ai.

Në fund, Jakupi komentoi edhe çfarë tregon për skenën politike fakti që vendi po shkon në zgjedhje të njëpasnjëshme brenda një kohe të shkurtër.

Sipas tij, zgjedhjet e përsëritura mund të shihen jo si zgjidhje e krizës politike, por si pasojë e paaftësisë së forcave politike për të ndërtuar një konsensus minimal.

“Fakti që vendi u detyrua të shkojë në zgjedhje nacionale disa herë brenda një periudhe relativisht të shkurtër (rreth një viti e gjysmë) ngre gjithashtu pyetje për funksionimin e klasës politike në tërësi. Nëse rezultati elektoral mbetet afërsisht i njëjtë dhe forca kryesore politike, Lëvizja Vetëvendosje së bashku me partnerët e saj të koalicionit, kishte marrë rreth shumicën e votave, atëherë mund të argumentohet se problemi nuk qëndronte vetëm te preferenca e elektoratit, por edhe te mungesa e kulturës së kompromisit ndërmjet aktorëve politikë. Në demokracitë parlamentare, kompromisi është shpesh i domosdoshëm për të siguruar funksionimin e institucioneve. Kur vendi shkon vazhdimisht në zgjedhje pa prodhuar ndryshime thelbësore në raportet politike, kjo mund të shihet si tregues se elita politike nuk po arrin të gjejë zgjidhje institucionale brenda mandatit që i kanë dhënë qytetarët. Nga ky këndvështrim, zgjedhjet e përsëritura mund të perceptohen jo si zgjidhje e krizës politike, por si pasojë e pamundësisë së forcave politike për të ndërtuar konsensus minimal për funksionimin e institucioneve.

Megjithatë, për hir të balancës, duhet theksuar se kundërshtarët e këtij argumenti do të thoshin se përgjegjësia nuk qëndron domosdoshmërisht te mungesa e kompromisit, por te dallimet programore dhe politike që mund ta bëjnë të vështirë ose të papranueshëm formimin e marrëveshjeve të caktuara. Në këtë lexim, zgjedhjet e reja shihen si mekanizëm demokratik për të kërkuar një mandat më të qartë nga qytetarët, edhe kur rezultati përfundimtar nuk ndryshon ndjeshëm”, përmbylli analisti për “Bota sot”.

The post Analistët: Rezultati i 7 qershorit rikonfirmoi epërsinë e LVV-së, opozita pa forcë për ndryshim appeared first on Albeu.com.

Edhe pse kanë mbetur ende pak vota pa u numëruar, rezultati i tanishëm mbetet i afërt me atë të zgjedhjeve të kaluara.

Kjo situatë ka hapur dilema mbi thelbin e këtij procesi zgjedhor: a prodhoi ai një ndryshim real në skenën politike, apo vetëm e rikonfirmoi gjendjen ekzistuese?

Lidhur me këtë zhvillim, për “Bota sot” foli profesori Enver Bytyçi, i cili deklaroi se që në natën e zgjedhjeve, sapo u publikuan shifrat paraprake, kishte parashikuar rritjen e LVV-së në mandate.

Sipas tij, ishte e pritshme që kjo parti të fitonte deputetë shtesë, pasi ende nuk ishin llogaritur votat me postë, ato në përfaqësi diplomatike dhe votat me kusht.

“Me datën 7 qershor në mbrëmje, pasi u mbyllën votimet, isha në një emisson thashë se Vetëvendosja do të shkojë në fund te 52-53 deputetë dhe do të krijojë shumicën qeverisëse. Jo se isha profet, por se dikush që ka ndjekur zhvillimet në proceset e kaluara zgjedhore, ka mundësi që të projektojë se sa është diferenca në rezultatet e të dhanëva paraprake me ato përfundimtare. Votat me kusht, votimet në ambasada dhe me postë ishin të panumëruara. Këto vota ishin diku te 15 përqind e votive të përgjithshme dhe natyrshëm që ndikojnë në rezultatin përfundimtar. Arsyetimi bazuar në rezultatet e shkuara të bënte që të besoje se VV do të shkonte në këtë përqindje. Pra to siguronte këta deputetë”.

Bytyçi vlerësoi gjithashtu se, me numrin aktual të mandateve, LVV së bashku me minoritetet joserbe mund ta formojë qeverinë, njësoj siç kishte mundësi edhe pas zgjedhjeve të dhjetorit.

Në analizën e tij për tri palë zgjedhjet e fundit, profesori theksoi se për postin e presidentit do të jetë e domosdoshme një marrëveshje politike mes partive.

Ai u shpreh me shpresën se subjektet politike do të gjejnë mirëkuptim dhe koordinim për të mbështetur një president konsensual.

“Numri prej 53 deputetësh i jep mundësi Lëvizjes Vetëvendosje që së bashku me minoritetet jo serbe të zgjedhë kryesinë e kuvendit dhe të formojë qeverinë. Këtë mundësi ajo e kishte edhe në zgjedhjet e 28 dhjetorit 2025, por nuk e kishte në zgjedhjet e 9 shkurtit 2025. Si duhet ta lexojmë votën e sovranit/ Më 9 shkurt 2025 sovrani nuk ia dha Vetëvendosjes votën e plotë për të zgjedhë krzesinë e kuvendit dhe për të formuar qeverinë. Pra nuk ia dha 61 deputetë. Kjo do të thotë se asokohe zgjedhësit donin që Lëvizja Vetëvendosje të krijonte një koalicion qeverisës. Kjo nuk ndodhi. Për mua, kryesisht për fajin e partive opozitare, të cilat nuk pranuan bashkëpunim dhe koalicion, madje as nuk shkuan në bisedime për këtë gjë. Qytetarët duhet ta dinin ofertën e Kurtit dhe shkakun e refuzimit të saj nga faktorët opozitarë. Por këtë mundësi ua ndaluan partitë opozitare. Sepse nuk pranuan të bisedojnë për bashkëpunim.

Në zgjedhjet e 28 dhjetorit 2025 dhe në ato të 7 qershorit 2026 qytetarët e Kosovës votuan dhe i dhanë Vetëvendosjes e partnerëve të saj të drejtën të formojnë kryesinë dhe qeverinë, por jo edhe ta zgjedhin kryetarin e shtetit. Kjo do të thotë se sovrani ka votuar në të dy rastet për bashkëqeverisje, për një shtet, i cili bazohet te bashkëpunimi dhe jo fryma e ndarjeve ideologjike ose ndarjeve klanore. Mesazhi duhet kuptuar nga të dy palët politike. Edhe nga zoti Kurti, edhe nga partitë e opozitës. Kjo do të thotë se duhet një president konsensual. Do të thotë që duhet kompromis midis mazhorancës dhe opozitës”, shtjelloi profesori.

Sipas Bytyçit, vota e qytetarëve tregoi qartë se ata e duan Albin Kurtin në postin e kryeministrit, ndërsa në krye të shtetit preferojnë një figurë neutrale.

Ai shtoi se një zgjedhje e tillë, ndonëse e vështirë, nuk është e paarritshme, teksa solli edhe një emër konkret si shembull.

“Zgjedhjet e 7 qershorit dhe rezultatet e tyre dëshmuan se qytetarët janë për statukuonë. Dmth se ata duan kryeministër Albin Kurtin e njëkohësisht duan një president së paku neutral. A ka president neutral? Është e vështirë, por jo e pamundur. Neutral do të thotë president me integritet dhe me dinjitet, i aftë dhe patriot. Opozita e ka mundësinë t’ia japë Kosovës një president të tillë. Psh po përmend vetëm një emër, një rast. Akademik Arsim Bajrami është vetofruar për të qenë kandidat për president. Partia Demokratike e Kosovës, megjithëse atij ia ka besuar tri herë postin e ministrit të Brendshem, ministrit të Pushtetit Lokal dhe atë të ministrit të Arsimit, nuk pranoi ta kandidojë. Pse? Sepse më duket se opozita, më shumë se mazhoranca nuk i pëlqen ata kandidatë që kanë integritet e dinjitet dhe që janë të shquar në punët akademike e shtetërore. Sepse politika dëshiron që presidentin ta ketë kukull për ta përdorur në luftën politike dhe jo për t’i dhënë autoritetin e kreut të shtetit”.

Në fund, profesori sqaroi edhe mënyrën se si partitë mund të arrijnë te zgjedhja e presidentit, duke nënvizuar se kushti kryesor për këtë detyrë duhet të jetë integriteti.

Ai paralajmëroi se, nëse nuk arrihet zgjedhja e presidentit, vendi rrezikon të futet në një bllokadë serioze politike me pasoja të tjera.

“Edhe kësaj radhe duket se ngërçi do të jetë te zgjedhje e presidentit. Unë mendoj që në axhendën e kuvendit të Kosovës pas zgjedhjes së kryesisë të jetë zgjedhja e presidentit. Për zgjedhjen e tij do të duhet që të gjitha subjektet politike të deklarohen që kriter themelor të jetë integriteti i kandidatit. Pra nëse propozohen kandidatë pa integritetin e plotë, ata të refuzohen, derisa të gjendet një kandidat i pranuar nga të gjitha ose disa palë. Mundet që mazhoranca të ofrojë një lloj modeli, sipas të cilit kush kandidat garanton votat e opozitës, ai kandidat të votohet edhe nga Vetëvendosja. Në këtë mënyrë eviton që të ketë një qeveri koalcioni. Sepse çdo bisedim për koalicion do të çojë jo vetëm në heqjen dorë prej saj të postit të presidentit, por edhe të një pjesë nga kabineti qeveritar. Psh, kam mendimin se Ramush Haradinaj mund të marrë edhe 15 vota nga PDK dhe LDK për postin e presidentit dhe ta plotësojë numrin që duhet.

Me rëndësi është që vendi të mos shkojë sërishmi në zgjedhje të reja. Nëse ndodh kjo, atëherë ka shumë mundësi që sovrani ta ndëshkojë këtë klasë politike me mospjesëmarrje, me bojkot, pra që ta delegjitomojë atë. Shenja të tilla u dhanë në zgjedhjet e 7 qershorit. Dhe për pjesmarrjen e ulët askush nuk mund të akuzojë kë!” – përmbylli Enver Bytyçi për “Bota sot”.

The post Bytyçi: Rezultati i zgjedhjeve forcon VV-në dhe nxjerr në pah pafuqinë e opozitës appeared first on Albeu.com.

Sipas Salianjit, kur opozita bashkon votat me qeverinë në ditët më të vështira të saj, nuk kemi më përballje politike, por mbijetesë të ndërsjellë.

“Të bashkosh votat me Ramën dy javë rresht, në momentin kur qeveria është nën presion për korrupsionin, zgjedhjet, standardet demokratike dhe integrimin europian, është mëkat ndaj shoqërisë dhe tradhti ndaj demokratëve që kanë sakrifikuar për të rrëzuar këtë regjim”, shkruan Salianji.

Postimi i Ervin Salianjit:

Në vend që opozita të ishte alternativa morale dhe politike përballë pushtetit, po shohim një marrëveshje të heshtur mbijetese: Rama mban pushtetin, Berisha mban partinë. Dhe në fund humbësi i vetëm mbeten qytetarët shqiptarë, të cilëve po u merret e drejta për të zgjedhur mes alternativash të vërteta.

Berisha voton për Ramën, Rama garanton pa garë Berishën nesër dhe qytetarëve u hiqet çdo mundësi reale zgjedhjeje.

Kur opozita bashkon votat me qeverinë pikërisht në ditët më të vështira të saj, nuk kemi më përballje politike, por mbijetesë të ndërsjellë.

Të bashkosh votat me Ramën dy javë rresht, në momentin kur qeveria është nën presion për korrupsionin, zgjedhjet, standardet demokratike dhe integrimin europian, është mëkat ndaj shoqërisë dhe tradhti ndaj demokratëve që kanë sakrifikuar për të rrëzuar këtë regjim.

Kur narrativa është se Shqipëria jeton në regjim dhe se integrimi europian duhet të bazohet mbi meritë, atëherë pyetja është e thjeshtë:

çfarë merite ka Edi Rama që sa herë ndodhet në zgrip, merr oksigjen politik nga Sali Berisha?

The post Salianji: Opozita dhe qeveria, marrëveshje të heshtur mbijetese, Rama mban pushtetin, Berisha partinë! Kur bashkohen votat s’ka më përballje politike appeared first on Albeu.com.

Ai theksoi se aktualisht nuk ka zgjedhje të afërta parlamentare që të vënë në diskutim shumicën socialiste prej 83 mandatesh, ndërsa përmendi zgjedhjet vendore të vitit të ardhshëm si procesin e radhës elektoral.

“Vakumi i krijuar për shkak se opozita zyrtare është një katastrofë ambulante mund të mbushet me negativitet dhe me një energji që mund të na pengojë në këtë rrugë. Këtu nuk është çështja e aritmetikës, as se kemi përpara zgjedhjeve, sepse ne nuk kemi përpara zgjedhje, përveçse në vitin e ardhshëm kur do të bëhen zgjedhjet vendore, por ato janë rëndësinë e tyre, por nuk vënë në pikëpyetje shumicën tonë prej 83 mandatesh, por nuk duhet që kjo atmosferë të vërë në pikëpyetje peshën e përgjegjësisë për secilin prej nesh. Unë kam kërkuar që ne të jemi shumë më afër anëtarësisë dhe të bisedojmë për çështjet e mëdha politike, shoqërore, ndërkohë që ne duhet të flasim me të gjithë pse duhet të jenë krenare që janë pjesë e kësaj familje politike”, tha Rama.

The post Rama: Opozita zyrtare, katastrofë ambulante, zgjedhjet vendore nuk e vënë në pikëpyetje shumicën tonë prej 83 mandatesh appeared first on Albeu.com.

Tubimi është njoftuar nga Partia Demokratike e Shqipërisë dhe do të zgjasë deri në orën 22:00, në bulevardin “Dëshmorët e Kombit”.

Policia e Tiranës ka marrë masa për mbarëvajtjen e protestës dhe ka paralajmëruar kufizime në qarkullimin e automjeteve në disa akse kryesore të qytetit.

Që prej mbrëmjes së një dite më parë është ndaluar parkimi në një pjesë të bulevardit, ndërsa gjatë pasdites së sotme do të bllokohen disa rrugë përreth zonës së protestës.

Ndër segmentet që preken janë bulevardi “Dëshmorët e Kombit”, nga zona pranë Ministrisë së Brendshme deri te sheshi “Nënë Tereza”, si dhe rrugët “Ukraina e Lirë”, “Papa Gjon Pali II” dhe “Ismail Qemali”.

Policia u ka kërkuar organizatorëve të respektojnë orarin dhe vendin e tubimit, ndërsa qytetarëve u është bërë thirrje për mirëkuptim për shkak të kufizimeve në lëvizje. Po ashtu, është kërkuar që të shmangen çdo veprim që mund të prishë rendin dhe sigurinë gjatë protestës.
Njoftimi i policisë:

Përfaqësues të subjektit politik Partia Demokratike e Shqipërisë kanë njoftuar Policinë e Tiranës për zhvillimin e një tubimi, më datë 17.04.2026, nga ora 19:00 deri në orën 22:00, në bulevardin “Dëshmorët e Kombit”, para godinës së Kryeministrisë.

Në bazë të ligjit “Për tubimet”, Policia e Tiranës ka marrë masat me qëllim garantimin e mbarëvajtjes së tubimit në vendin dhe afatin kohor të kërkuar.

Në zbatim të këtyre masave, ditën e sotme dhe të nesërme, do të kufizohet lëvizja në disa akse/segmente rrugore, konkretisht:

nga ora 23:45 e datës 16.04.2026 deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”,
nga vendi i quajtur “Ura e Dajtit” deri në rrugën “Ismail Qemali”;
nga ora 15:00 e datës 17.04.2026 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër

Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia e Tiranës apelon për organizatorët e tubimit për respektimin e afatit kohor dhe vendit ku do të zhvillohet tubimi, si dhe kërkon mirëkuptimin e qytetarëve për kufizimin e lëvizjes me automjete.

Gjithashtu, apelon që të distancohen në rast se gjenden përballë veprimeve të kundërligjshme që cenojnë rendin dhe sigurinë publike.

The post OPOZITA I RIKTHEHET SHESHIT/ Çfarë pritet të ndodhë sot pasdite para Kryeministrisë? Masat e policisë dhe rrugët që do bllokohen në Tiranë appeared first on Albeu.com.

Ndërkohë, parashikohet interpelancë me ministrinë Bujqësisë dhe ministrinë Arsimit, kërkuar nga një grup deputetësh të PD.

Në rendin e ditës janë përfshirë gjithashtu shqyrtimi i disa projektligjeve.

RENDI I DITËS

Në mbështetje të urdhrit nr. 25, datë 14.4.2026 të Kryetarit të Kuvendit, z. Niko Peleshi, rendi i ditës është si më poshtë vijon:

1. Miratimi i procesverbalit të seancës plenare të datës 9.4.2026. (Neni 44, pika 2, të Rregullores së Kuvendit)

2. Njoftime. (Neni 44, pika 3, të Rregullores së Kuvendit)

3. Interpelancë urgjente me Ministrin e Mbrojtjes, z. Ermal Nufi, kërkuar nga një grup deputetësh të Grupit Parlamentar të Partisë Demokratike. (Në mbështetje të nenit 80 të Kushtetutës dhe nenit 97 të Rregullores së Kuvendit)

4. Interpelancë urgjente me Ministrin e Arsimit, znj. Mirela Kumbaro, kërkuar nga një grup deputetësh të Grupit Parlamentar të Partisë Demokratike. (Në mbështetje të nenit 80 të Kushtetutës dhe nenit 97 të Rregullores së Kuvendit)

5. Interpelancë me Kryeministrin e Republikës së Shqipërisë, z. Edi Rama, kërkuar nga deputetët Agron Shehaj dhe Erald Kapri. (Në mbështetje të nenit 80 të Kushtetutës dhe nenit 96 të Rregullores së Kuvendit)

6. Interpelancë me Zëvendëskryeministrin e Republikës së Shqipërisë, znj. Albana Koçiu, kërkuar nga deputetët Agron Shehaj dhe Erald Kapri. (Në mbështetje të nenit 80 të Kushtetutës dhe nenit 96 të Rregullores së Kuvendit)

7. Projektligji “Për ratifikimin e protokollit shtesë 7 për zgjidhjen e mosmarrëveshjeve të marrëveshjes për amendimin dhe aderimin në Marrëveshjen e Tregtisë së Lirë të Evropës Qendrore, ratifikuar me ligjin nr. 9696, datë 21.3.2007”. (Në mbështetje të neneve 78, 83, pika 1, dhe 121, të Kushtetutës, si dhe neneve 55, 73-77 të Rregullores, shumicë absolute votash për miratim) Pyetje Shprehet nismëtari Shprehet Komisioni përgjegjës për Ekonominë, Punësimin dhe Financat Dhënie mendimi Komisioni për Çështjet Ligjore dhe Administratën Publike Dhënie mendimi Komisioni për Burimet Natyrore, Infrastrukturën dhe Zhvillimin e Qëndrueshëm Dhënie mendimi Komisioni për Europën dhe Punët e Jashtme Dhënie mendimi Komisioni për Bujqësinë, Ushqimin dhe Zhvillimin Rural Diskutime (Shprehen grupet parlamentare) Koha e votimit

8. Projektligji “Për ratifikimin e marrëveshjes së financimit, ndërmjet Këshillit të Ministrave të Republikës së Shqipërisë, përfaqësuar nga Ministria e Financave, dhe Cassa Depositi e Prestiti S.p.A., “Përmirësimi i rrjetit të transmetimit të energjisë elektrike në veri të Shqipërisë pas tërmetit të vitit 2019””.

9. Projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, mbi bashkëpunimin teknik 2024, për projektin “Green Vjosa (Vjosa e gjelbër) – Zhvillim rajonal i gjelbër dhe gjithëpërfshirës në zonën e ujëmbledhësit të Parkut Kombëtar të Vjosës””.

10.Projektligji “Për aderimin e Republikës së Shqipërisë në marrëveshjen për zbatimin e dispozitave të Konventës së Kombeve të Bashkuara për të Drejtën e Detit të 10 dhjetorit 1982, që lidhen me ruajtjen dhe menaxhimin e burimeve peshkore ndërkufitare dhe të burimeve shumëmigruese”.

11.Projektligji “Për disa shtesa dhe ndryshime në ligjin nr. 33, datë 31.03.2021, “Për Gardën e Republikës së Shqipërisë”, i ndryshuar”.

12.Projektvendimi “Për zgjedhjen e Kryetarit të Komisionit të Autoritetit të Konkurrencës”.

13.Diskutime për çështje jashtë rendit të ditës. (Në mbështetje të nenit 45 të Rregullores së Kuvendit: Çdo deputet mund të flasë jo më shumë se 5 minuta dhe nëse diskuton në emër të grupit parlamentar, jo më shumë se 8 minuta. Koha e diskutimeve për çështje jashtë rendit të ditës nuk mund të jetë më shumë se 60 minuta.)

The post Sot seancë në Kuvend/ Opozita interpelancë me Ramën dhe Koçiun, çfarë përmban rendi i ditës appeared first on Albeu.com.

Tek ne, opozita dhe Berisha duket se po përballen pikërisht me këtë krizë, mungesën e besimit publik.

Retorika është e fortë, akuzat janë të përditshme, ndërsa denoncimet për korrupsion janë të shumta. Vetë opozita flet për një nivel alarmant korrupsioni në qeverinë e Edi Rama. Por pyetja që shtrohet natyrshëm është, nëse korrupsioni është kaq i madh dhe kaq i dukshëm, pse qytetarët nuk reagojnë masivisht?

Përgjigjja duket e thjeshtë dhe njëkohësisht e dhimbshme për opozitën, sepse nuk besojnë.

Opozita ka dështuar të prodhojë mobilizim real qytetar. Tubimet sporadike me disa qindra protestues nuk mjaftojnë për të krijuar presion politik. Historia ka treguar se ndryshimet e mëdha nuk vijnë nga “200 veta çdo të hënë”, por nga pjesëmarrje masive dhe e vazhdueshme.

Në vende të tjera, qytetarët kanë detyruar dorëheqje përmes presionit publik. Në Shqipëri, edhe kur ka pasur zhvillime të rëndësishme, roli vendimtar shpesh nuk ka qenë i opozitës, por i institucioneve si SPAK. Kjo e dobëson narrativën e opozitës si forcë ndryshimi.

Diskursi politik i opozitës ka mbetur i mbërthyer në një cikël të përsëritur: “Rama ik!”.
Ky mesazh, i konsumuar prej vitesh, nuk prodhon më efekt. Përkundrazi, ai është kthyer në një klishe që nuk mobilizon askënd.

Në të njëjtën kohë, daljet e shpeshta mediatike dhe “foltoret” nuk janë përkthyer në strategji konkrete. Ka një hendek të madh mes fjalëve dhe veprimit.

Qeveria nuk rrëzohet me deklarata televizive, por me alternativa të besueshme dhe organizim politik serioz.

Një nga problemet më të mëdha të opozitës është perceptimi publik se ajo përfaqëson të njëjtët individë, të njëjtin cikël politik dhe të njëjtën kulturë qeverisëse. Nuk ka hapësirë reale për gjeneratën e re, për ide të reja dhe për një model të ri drejtimi.

Kjo krijon një boshllëk: qytetarët e pakënaqur me qeverinë nuk e shohin opozitën si alternativë. Ata nuk dalin në protestë jo sepse janë të kënaqur, por sepse nuk shohin një “dritë jeshile” për ndryshim.

Një tjetër element që minon besimin është perceptimi se një pjesë e elitës politike, si në pushtet ashtu edhe në opozitë, ka interesa të ndërthurura ekonomike. Kur qytetarët besojnë se politika dhe biznesi janë të lidhura ngushtë, atëherë çdo thirrje për protestë humbet besueshmërinë.

Në këtë kontekst, akuzat për korrupsion ndaj figurave të ndryshme politike, qofshin në qeveri apo në opozitë, nuk prodhojnë më indinjatë të re, por një lloj apatie kolektive.

Vetë Sali Berisha, ka treguar në të kaluarën se di të ndërtojë aleanca dhe të krijojë frymë fituese. Fitorja e vitit 2005 erdhi edhe si rezultat i bashkimit të faktorëve të ndryshëm dhe përçarjes së kundërshtarit.

Sot, situata është e kundërt. Opozita është e fragmentuar, ndërsa përpjekjet për bashkim duken më shumë simbolike sesa reale. Thirrjet për bashkëpunim nuk janë shoqëruar me mekanizma konkretë dhe besueshmëri reciproke.

Problemi kryesor nuk është mungesa e skandaleve për të denoncuar, por mungesa e një alternative që bind. Qytetarët shqiptarë nuk janë më të gatshëm të zëvendësojnë një model që e konsiderojnë të korruptuar me një tjetër që perceptohet si i tillë.

Pa një reformim të thellë, pa hapje ndaj figurave të reja dhe pa një projekt të qartë politik, opozita rrezikon të mbetet në një rol periferik: zhurmë politike pa ndikim real.

Në fund, një pyetje mbetet thelbësore, a kërkon opozita vërtet pushtetin për të ndryshuar sistemin, apo thjesht për ta zëvendësuar atë? Derisa kjo dilemë të marrë përgjigje të qartë në sytë e qytetarëve, mosbesimi do të vazhdojë të jetë pengesa më e madhe për çdo rotacion politik në Shqipëri.

The post Opozita pa besim, pse modeli “Rama ik!” nuk po prodhon ndryshim appeared first on Albeu.com.

Rama theksoi se është shumë e dëmshme kur disa përfaqësues të opozitës, të cilët kanë mundësi të komunikojnë me media dhe grupe parlamentare të huaja, nuk kuptojnë pasojat e veprimeve të tyre.

“Njerëzit që japin intervista në media të huaja dhe komunikojnë me grupe parlamentare, pavarësisht se përfaqësojnë forca opozitare, nuk e kanë idenë se çfarë dëmi bëjnë dhe nuk u intereson fare. Ata nuk lënë gur pa luajtur për të futur dyshimin te Shqipëria dhe te procesi i integrimit”, u shpreh Rama.

Ai shtoi se Komisioni Europian nuk lejohet të mashtrohet nga këto veprime.

“Komisioni Europian ndjek çdo gjë 24 orë, shtatë ditë në javë. Ka një strukturë të organizuar që mbulon çdo fushë dhe nuk gënjehet dot”, tha kryeministri, duke nënvizuar rëndësinë e një imazhi të qartë dhe të përgjegjshëm të Shqipërisë në arenën ndërkombëtare.

The post Ngec integrimi në BE? Rama gjen ‘fajtorin’: Opozita po dëmton imazhin e Shqipërisë. 2030, afat i arsyeshëm nëse… appeared first on Albeu.com.

Në sqarim thuhet se më 4 mars 2026 Kryetari i Kuvendit kishte kërkuar caktimin e dy deputetëve nga grupi parlamentar i PD-së për delegacionin. Përfaqësues u emëruan Tomorr Alizoti dhe Klevis Balliu.

Sipas grupit të PD, Niko Peleshi, ka vendosur më pas të përjashtojë grupin më të madh të opozitës nga delegacioni zyrtar pa dhënë arsye, duke hequr emrat e përfaqësuesve të PD-së dhe duke i privuar ata nga përfaqësimi institucional.

Sqarimi i Grupit Parlamentar të PD

Në përgjigje të interesit të medias lidhur me mungesën e Grupit më të madh të opozitës në Kuvend, në delegacionin e Kryetarit të Kuvendit gjatë vizitës në Gjermani, Grupi Parlamentar i PD sqaron si më poshtë:

Në vijim të kërkesës së datës 4 Mars 2026 të vetë Kryetarit të Kuvendit për të caktuar dy deputetë të grupit tonë parlamentar në këtë Delegacion, nga ana e kryetarit të grupit parlamentar u caktuan z. Tomorr Alizoti – Nënkryetar i grupit parlamentar dhe njëherazi Nënkryetar i Grupit të Miqësisë Shqipëri – Gjermani; si dhe z. Klevis Balliu – Nënkryetar i Komisionit të Sigurisë dhe njëherazi anëtar i Grupit të Miqësisë Shqipëri – Gjermani.

Niko Peleshi, në një akt të paprecedentë për një Kryetar Kuvendi, por të përsëritur prej tij, ka vendosur më pas pa asnjë arsye të përjashtojë grupin më të madh të opozitës në Kuvend nga delegacioni zyrtar i Kuvendit të Shqipërisë në Bundestag. Emrat e përfaqësuesve të Partisë Demokratike u hoqën qëllimisht për ta përjashtuar PD nga përfaqësimi institucional.

Fatkeqësisht, ky vendim tregon sa vite dritë larg standardeve demokratike të Bundestagut gjerman është sot drejtimi i maxhorancës parlamentare.

Trajtimi i opozitës si armik nuk e zhbën problemin kryesor të kësaj maxhorance: lidhjet me krimin e organizuar dhe mbrojtjen e korrupsionit përmes votës në Parlament. Dhe ndërkohë që flasin për anëtarësim në Europë, negociatat më të frytshme i bëjnë me skifterët e orëve të vjedhura nëpër Europë apo duke bashkëpunuar me organizatat më të rrezikshme kriminale në vend!

Ne nuk presim standarde europiane nga një Kryetar Kuvendi që nuk vendos dot vetë, por urdhërohet nga ushtarët politikë të Suel Çelës.

Po të mos ishte në kërkim ky i fundit, sot mund ta shihnim si pjesë të delegacionit njëpartiak në Bundestag.

Mirëpo, kjo sjellje e Kryetarit të Kuvendit nuk e pengon opozitën që të përfaqësohet në marrëdhëniet me partnerët tanë ndërkombëtar. Opozita po zhvillon takimet e saj në Bundestag dhe në Qeverinë Federale Gjermane, në nivelet më të larta, të planifikuara më herët. Ne po përfaqësojmë PD dhe Shqipërinë me dinjitet dhe me qëndrime të qarta për shtetin ligjor dhe integrimin europian.

The post Opozita jashtë delegacionit e Kuvendit në Bundestag/ PD: Vendim i paprecedentë nga Peleshi, urdhërohet nga ushtarët politikë të Suel Çelës appeared first on Albeu.com.

Me 79 votat e mazhorancës socialiste, pas fjalës së mbajtur nga kreu i grupit Taulant Balla, u kalua rezoluta e propozuar.

Pati vetëm një abstenim nga deputeti i Lëvizjes Bashkë, Redi Muçi, ndërsa prezent nga opozita ka qenë edhe deputeti Erald Kapri.

58 deputetë të opozitës, kryesisht PD, nuk ishin prezent në këtë seancë, pasi e quajtën axhendë personale të kryeministrit Edi Rama dhe fasadë.

Sipas kreut të Grupit Parlamentar të PD, Gazment Bardhi, seanca është thirrur jashtë ditës së zakonshme të zhvillimit të saj, që është e enjtja, dhe me një rend dite që përfshin vetëm miratimin e procesverbalit dhe njoftime.

Ai theksoi se kjo nuk është një seancë normale parlamentare, por një mbledhje e thirrur për axhendën personale të Kryeministrit Edi Rama dhe të kreut të Kuvendit Niko Peleshi, pa një rend dite të miratuar apo të shpallur zyrtarisht dhe në shkelje të procedurave që parashikon Rregullorja e Kuvendit.

Kurse kreu i Grupit Parlamentar të Partisë Socialiste, Taulant Balla, gjatë fjalës në Kuvend ku lexoi rezolutën dhe ftoi për votim kolegët, shprehu keqardhje për mungesën e deputetëve të opozitës, të cilët bojkotuan seancën e sotme pas akuzave se seanca u thirr në kundërshtim me rregulloren.

Pasi prezantoi rezolutën, ai theksoi se deputetët e opozitës duhet të mbështesnin qëndrimin kundër Iranit duke qëndruar në krah të Shqipërisë dhe aleatëve si SHBA, Franca e Gjermania që kanë vepruar njësoj, por sipas tij, nuk dolën dot nga interesi i tyre i vogël për një protestë që ai e cilësoi si pa krye.

Dokumenti i plotë:

“PROJEKT  R E Z O L U T Ë

Për shpalljen e Republikës Islamike të Iranit si Shtet Sponsor i Terrorizmit dhe Shtet që përdor mjete terroriste.

Kuvendi i Shqipërisë,

Duke qenë se Republika e Shqipërisë është fuqimisht e përkushtuar ndaj parimeve të Kartës së Kombeve të Bashkuara, të drejtës ndërkombëtare dhe mbrojtjes së paqes dhe sigurisë ndërkombëtare;

Duke qenë se terrorizmi në të gjitha format dhe shfaqjet e tij përbën një nga kërcënimet më serioze ndaj paqes ndërkombëtare, sigurisë dhe shoqërive demokratike;

Duke qenë se raporte të besueshme dhe vlerësime ndërkombëtare kanë dokumentuar në mënyrë të përsëritur përfshirjen e autoriteteve të Republikës Islamike të Iranit në financimin, trajnimin, armatosjen dhe drejtimin e grupeve dhe organizatave të armatosura jo-shtetërore të shpallura si entitete terroriste në disa rajone;

Duke qenë se Republika Islamike e Iranit, përmes institucioneve të saj shtetërore, përfshirë Gardën Revolucionare Islamike (IRGC) dhe strukturat e lidhura me të, ka mbështetur dhe koordinuar aktivitete që destabilizojnë vende në Lindjen e Mesme dhe më gjerë;

Duke qenë se Republika e Shqipërisë ka qenë vetë objekt i veprimeve armiqësore në hapësirën kibernetike, përfshirë sulmin e rëndë kibernetik ndaj institucioneve shtetërore shqiptare në vitin 2022, i atribuar strukturave të lidhura me Republikën Islamike të Iranit, si dhe përpjekjet e ditëve të fundit për sulme kibernetike ndaj sistemeve të Kuvendit të Shqipërisë;

Duke qenë se aktet e dhunës dhe të agresionit, përfshirë sulmet kibernetike kundër institucioneve shtetërore, infrastrukturës kritike dhe shteteve sovrane përbëjnë shkelje të së drejtës ndërkombëtare dhe mund të përbëjnë forma të terrorizmit;

Duke qenë se përdorimi sistematik i frikësimit, i grupeve të armatosura proxy, si dhe i mjeteve hibride për të përhapur frikë dhe destabilizim është i papajtueshëm me normat e marrëdhënieve paqësore ndërkombëtare;

Duke qenë se Republika e Shqipërisë, si anëtare e NATO-s dhe vend kandidat për anëtarësim në Bashkimin Evropian, ka në themel të politikës së saj të jashtme dhe të sigurisë parimet e solidaritetit demokratik, shtetit të së drejtës dhe mbrojtjes së paqes dhe stabilitetit ndërkombëtar;

Duke qenë se populli dhe institucionet shqiptare mbeten të përkushtuara në luftën kundër terrorizmit në të gjitha format e tij dhe në mbajtjen përgjegjës të atyre që sponsorizojnë ose kryejnë akte terrori;

Kuvendi i Shqipërisë:

1. Dënon me termat më të ashpër veprimet e Qeverisë së Republikës Islamike të Iranit që mbështesin, mundësojnë ose kryejnë akte terrorizmi, operacione hibride dhe aktivitete destabilizuese në rajone të ndryshme të botës si dhe shpreh solidaritetin e plotë me vendet mike të Gjirit Persik dhe me Turqinë, të cilat janë shënjestuar nga aktiviteti terrorist i sponsorizuar nga Qeveria e Republikës Islamike të Iranit.

2. Dënon gjithashtu sulmet kibernetike të kryera kundër institucioneve të Republikës së Shqipërisë, përfshirë sulmin e vitit 2022 ndaj infrastrukturës shtetërore dhe përpjekjet e fundit për ndërhyrje në sistemet e Kuvendit të Shqipërisë.

3. Shpall Republikën Islamike të Iranit si Shtet Sponsor të Terrorizmit dhe si shtet që përdor mjete terroriste në ndjekje të objektivave të tij të politikës së jashtme.

4. Dënon aktivitetet e Gardës Revolucionare Islamike (IRGC) dhe entiteteve të lidhura me të për rolin e tyre në mbështetjen e organizatave terroriste, forcave të armatosura përfaqësuese dhe operacioneve destabilizuese.

5. I bën thirrje Qeverisë së Republikës së Shqipërisë që :

– të forcojë masat kombëtare dhe ndërkombëtare për të luftuar terrorizmin e sponsorizuar nga shtetet dhe kërcënimet kibernetike;

– të bashkëpunojë ngushtë me vendet aleate dhe partnere në parandalimin dhe luftimin e financimit të terrorizmit dhe aktiviteteve të lidhura me strukturat shtetërore iraniane;

– të mbështesë nismat në organizatat ndërkombëtare që synojnë përgjegjshmërinë për aktet e terrorizmit, sulmet kibernetike dhe shkeljet e së drejtës ndërkombëtare.

– të shpallë menjëherë Gardën Revolucionare Islamike (IRGC), si organizatë terroriste,

– të shpallë gjithashtu Hezbollah si një organizatë terroriste proxy të Republikës Islamike të Iranit, duke iu bashkuar Shteteve të Bashkuara të Amerikës, Gjermanisë, Hollandës dhe një numri shtetesh anëtare të BE-së si dhe vende të tjera, të cilat e kanë ndërmarrë më parë këtë përcaktim.

6. U bën thirrje vendeve demokratike, organizatave ndërkombëtare dhe partnerëve të Shqipërisë që të shqyrtojnë masa të koordinuara kundër terrorizmit të sponsorizuar nga shtetet dhe të forcojnë bashkëpunimin ndërkombëtar në luftën kundër këtyre kërcënimeve.

7. Rikonfirmon përkushtimin e palëkundur të Shqipërisë ndaj paqes ndërkombëtare, vlerave demokratike dhe mbrojtjes së civilëve nga aktet e terrorit.

8. Udhëzon që kjo Rezolutë t’i përcillet Qeverisë së Republikës së Shqipërisë, qeverive aleate, Organizatës së Kombeve të Bashkuara, Bashkimit Evropian dhe partnerëve të tjerë ndërkombëtarë përkatës”.

The post Opozita bojkotoi, Kuvendi miraton rezolutën me 79 vota, shpall Iranin shtet terrorist (VIDEO) appeared first on Albeu.com.