Talenti kosovar i bashkohet skuadrës së re pas përfundimit me marrëveshje të kontratës së tij me NK Slaven Belupo. Ai ishte bërë pjesë e ekipit nga Koprivnica në verën e vitit 2024, kur u transferua nga Phoenix i Kosovës.

Në edicionin e fundit, Qestaj zhvilloi gjithsej 6 ndeshje zyrtare me ekipin e parë të Slaven Belupos, prej tyre 5 në kampionat dhe 1 në Kupën e Kroacisë.

Te Karlovaci, ai pritet të ofrojë freski në fazën sulmuese, më shumë alternativa në repartin ofensiv dhe garë më të madhe brenda skuadrës.

“Ernis, mirë se erdhe në Karlovac!”, thuhej në mesazhin e klubit kroat në momentin e prezantimit të futbollistit kosovar.

Qestaj është gjithashtu pjesë e Kombëtares së Kosovës U19, me të cilën aktivizohet me shumë sukses.

The post Ernis Qestaj zyrtarizohet te Karlovac, nis aventurën e re në Kroaci appeared first on Albeu.com.

Konfirmimi për transferimin e tij erdhi përmes një njoftimi zyrtar nga Verona, ekip ku Bega do të synojë të japë kontributin e tij në përpjekjen për rikthim në Serie A.

Futbollisti ka firmosur një marrëveshje trevjeçare, pasi iu bashkua klubit si lojtar i lirë, meqë kontrata e tij me skuadrën zvicerane Stade Nyonnais përfundoi gjatë verës.

“Hellas Verona është e lumtur të afrojë mesfushorin Leorat Bega. Lojtari, kontrata e të cilit me ekipin Stade Nyonnais po skadonte, ka nënshkruar deri më 30 qershor 2029”, thuhet në komunikatë.

I lindur në vitin 2003, Bega konsiderohet një lojtar me vlera të mëdha, ndërsa në edicionin e kaluar ai regjistroi 56 paraqitje, duke realizuar pesë gola dhe tri asistime.

Së fundmi, ai ka qenë pjesë e Zvicrës U19, çka nënkupton se në një të ardhme të afërt gëzon të drejtën të luajë për Kosovën.

The post Leorat Bega zyrtarizohet te Hellas Verona appeared first on Albeu.com.

Kapiteni i përfaqësueses helvetike e priti me vlerësim këtë konsideratë, duke theksuar se fjalë të tilla nga ish-futbollistë i shtojnë motivimin për të synuar arritje të tjera me ekipin kombëtar.

“Sigurisht që do të thotë shumë për mua. Jashtë fushës ka gjithmonë njerëz që të duan më shumë ose më pak. Por kur e dëgjon këtë nga ish-lojtarët dhe shokët e skuadrës, është një kënaqësi e madhe. Më jep motivim dhe vullnet për të arritur diçka të madhe sërish”, ka deklaruar Xhaka për Blue Sport.

Megjithatë, mesfushori me prejardhje shqiptare nuk pranoi të përcaktojë vetë se kush meriton të quhet futbollisti më i mirë në historinë e Zvicrës.

Ai u shpreh se gjatë periudhës së tij te kombëtarja kanë kaluar shumë lojtarë të mëdhenj dhe se është e vështirë të veçohet vetëm një emër. Sipas tij, ai nuk është ithtar i vlerësimeve individuale, pasi e sheh veten si një futbollist që vendos ekipin në plan të parë, ndërsa gjykimin ua lë të tjerëve.

“Ka pasur shumë lojtarë të mëdhenj në ekipin kombëtar gjatë periudhës sime. Është e vështirë të zgjedhësh vetëm një. Nuk jam adhurues i çmimeve individuale, por jam një lojtar që mendon për ekipin. Janë njerëzit ata që duhet të gjykojnë dhe të vendosin, jo unë”, u shpreh ai.

Mes atyre që e kanë përzgjedhur Granit Xhakën si më të mirin në historinë e kombëtares zvicerane përmenden Dominique Herr, Erni Maissen, Alexandre Rey, Karl Engel, Sani Gygax dhe Admir Mehmedi.

Këto vlerësime vijnë pas një rruge të jashtëzakonshme të Xhakës me fanellën e Zvicrës, ku për shumë vite ai ka qenë lider dhe një nga elementët më të rëndësishëm të përfaqësueses helvetike.

The post Granit Xhaka shmang krahasimet, edhe pse shumë emra të mëdhenj e quajnë më të mirin në historinë e Zvicrës appeared first on Albeu.com.

Pas analizimit të 36 ndeshjeve të para të turneut, në vendin e parë figuron mesfushori i Zvicrës, Granit Xhaka, i cili është vlerësuar me 91.8 pikë.

Kapiteni i përfaqësueses zvicerane është dalluar për saktësinë dhe efikasitetin në qarkullimin e topit në momente të ndërlikuara, kur kundërshtarët ushtrojnë presion të drejtpërdrejtë.

Menjëherë pas tij vjen mesfushori i Spanjës, Rodri, me 90.8 pikë. Futbollisti spanjoll vazhdon të dëshmojë statusin e tij si një nga organizatorët më të mirë të lojës në futbollin botëror, duke pasur rol kyç në kontrollin e ritmit të ndeshjeve.

Në pozitën e tretë renditet befasueshëm mbrojtësi qendror i Zvicrës, Manuel Akanji, me 88.2 pikë. Lojtari i Manchester Cityt ka shfaqur qetësi të madhe dhe saktësi të lartë në ndërtimin e aksioneve nga zona defensive.

Pesëshja e parë përmbyllet me koreano-jugorin Lee Kang-in në vendin e katërt me 87.3 pikë dhe me mbrojtësin e Turqisë, Zeki Çelik, në pozitën e pestë me 86.1 pikë.

Në këtë listë bie në sy edhe emri i mesfushorit të Barcelonës dhe Spanjës, Pedri, i cili pozicionohet i gjashti me 84.9 pikë.

Kjo statistikë nuk kufizohet vetëm te saktësia e pasimeve, por mat cilësinë e tyre në çaste kur lojtarët veprojnë nën trysninë e kundërshtarëve. Për këtë arsye, ajo shihet si një tregues i rëndësishëm i aftësisë së futbollistit për të komanduar lojën dhe për të marrë vendime në situata të vështira.

Performancat e Xhakës, Rodrit dhe Akanjit kanë qenë mes elementëve kryesorë që kanë ndihmuar Zvicrën dhe Spanjën të paraqesin nivel të lartë organizimi në fazën e grupeve, ndërsa kjo renditje nënvizon edhe një herë peshën e lojtarëve që përcaktojnë ritmin e lojës nga mesfusha dhe prapavija.

The post Granit Xhaka në krye, Rodri pas tij – zbulohet renditja e mesfushorëve më të mirë të Botërorit në pasime nën presion appeared first on Albeu.com.

Interesi për sulmuesin e Kombëtares shqiptare në Serie A vazhdon të rritet dhe klubi më i fundit që ka hyrë në skenë është Parma, e cila ka shprehur dëshirën për ta afruar.

Gjithsesi, tabloja nuk ka ndryshuar, pasi raportohet se Broja ka miratuar kalimin te Cagliari, ekipi që kishte bërë lëvizjen e parë konkrete për të.

Megjithatë, mbyllja e operacionit nuk pritet të jetë e thjeshtë, duke qenë se Burnley synon të marrë sa më shumë nga shitja e lojtarit, të cilin e bleu nga Chelsea për rreth 20 milionë euro vetëm një vit më parë.

Tani mbetet të kuptohet se mbi çfarë formule do të ndërtohet marrëveshja mes klubeve, të cilat në parim duken të hapura për të gjetur një zgjidhje dhe për ta çuar me sukses deri në fund këtë lëvizje të rëndësishme për të ardhmen e Brojës.

The post Armando Broja zgjedh Cagliarin, edhe Parma hyn në garë për sulmuesin shqiptar appeared first on Albeu.com.

Gardiani 25-vjeçar u transferua te Lugano nga Schaffhausen në vitin 2021 dhe, gjatë qëndrimit të tij atje, u kthye në një prej portierëve më të rëndësishëm të ekipit, duke zhvilluar 180 ndeshje me fanellën bardhezi.

Ndër kujtimet më të spikatura të periudhës së tij te Lugano mbetet fitorja 4-1 kundër St. Gallenit në finalen e Kupës së Zvicrës, e zhvilluar në maj të vitit 2022.

Rrethanat për të ndryshuan në sezonin e kaluar, kur në skuadër erdhi në huazim David von Ballmoos dhe mori statusin e portierit të parë. Megjithatë, për shkak të mungesave të shpeshta të zviceranit, Shaipi arriti të regjistrojë gjithsej 28 paraqitje gjatë sezonit.

Vendimi i Luganos për ta blerë përfundimisht David von Ballmoos ka rritur mundësitë që portieri kosovar të largohet gjatë kësaj vere, edhe pse kontrata e tij skadon pas një viti.

Sipas gazetarit turk Resat Can Ozbudak, Shaipi ka arritur një marrëveshje me Amed SK, ekip që ka siguruar promovimin në Superligën e Turqisë për edicionin e ardhshëm.

Nëse ky transferim përmbyllet, atëherë për Shaipin do të jetë përvoja e parë jashtë futbollit zviceran. Në vitet e formimit, ai ka qenë pjesë e akademive të Schaffhausenit, Winterthurit dhe Grasshopperit.

Një lëvizje drejt Turqisë mund të jetë një etapë e rëndësishme për karrierën e portierit kosovar, i cili synon të rikthehet si zgjedhje e parë dhe të vazhdojë rritjen e tij në një kampionat më konkurrues.

The post Amir Shaipi pranë kalimit te Amed SK në Turqi appeared first on Albeu.com.

Mesfushori e udhëhoqi sërish repartin e mesit të Zvicrës në fitoren 4-1 ndaj Bosnjës dhe Hercegovinës, ndërsa në fund të takimit vulosi rezultatin përfundimtar me golin e fundit të ndeshjes.

Pasi shënoi nga pika e bardhë, futbollisti zviceran me prejardhje shqiptare bëri një gjest që imitonte të folurin dhe bisedën, duke dërguar kështu një mesazh të qartë.

Sipas mediave në Zvicër dhe Gjermani, ky reagim ishte i drejtuar ndaj mediave zvicerane, të cilat e kishin akuzuar për krijimin e një klime toksike dhe të pashëndetshme në dhomën e zhveshjes dhe brenda ekipit.

Gjithçka lidhet me reagimin e tij pas barazimit me Katarin, kur Xhaka kritikoi ashpër paraqitjen e Zvicrës, sidomos pas golit të pësuar në çastet e fundit të ndeshjes. Në rolin e kapitenit, ai foli hapur për ekipin e tij, por më pas u përball me akuza nga mediat e atjeshme se po nxiste trazira.

Me festën e golit ndaj Bosnjës dhe Hercegovinës, Xhaka duket se zgjodhi t’u përgjigjej pikërisht këtyre kritikave, pasi realizoi penalltinë që vendosi rezultatin 4-1.

“Nuk është gjithmonë e lehtë. Do të gënjeja nëse do të thosha se hyri nga një vesh dhe doli nga tjetri. Më dhemb. Ka gjëra që thjesht nuk i kuptoj. Janë shkruar shumë, pardje pati një artikull të madh që nuk mund ta injorosh”, tha Xhaka pas fitores.

Në ndryshim nga reagimi pas ndeshjes së parë, kësaj here ai i përgëzoi bashkëlojtarët për paraqitjen si grup, disiplinën dhe luftën e treguar gjatë të 90 minutave. Xhaka nënvizoi gjithashtu se Zvicra u paraqit e fortë dhe e bashkuar në fushë.

The post Mesazhi i Xhakës pas golit ndaj Bosnjës dhe Hercegovinës, zbulohet kujt iu drejtua appeared first on Albeu.com.

Në këtë kuadër, merkatoja e katalunasve mbetet shumë aktive. Presidenti Joan Laporta, së bashku me trajnerin Hansi Flick, janë duke ndërtuar një projekt të ri sportiv që nuk përfshin më sulmuesin veteran polak.

Media spanjolle raportojnë se stafi teknik ka përzgjedhur katër emra për të mbuluar boshllëkun në sulm, me profile të ndryshme edhe në aspektin financiar: Julian Alvarez, Mikel Oyarzabal, Gabriel Jesus dhe Fisnik Asllani.

Emri që kryeson listën e Barcelonës për qendrën e sulmit është Julian Alvarez. Sulmuesi i Argjentinës dëshiron të transferohet te gjiganti katalunas, por bisedimet me Atletico Madridin kanë hasur vështirësi serioze.

Klubi madrilen nuk pranon të hyjë në negociata për shitjen e tij dhe kërkon që Barcelona të derdhë të plotë klauzolën e largimit prej 500 milionë eurosh. Alvarez realizoi 20 gola në 49 ndeshje sezonin e kaluar dhe është i lidhur me kontratë deri në vitin 2030.

Për shkak të pengesave të qarta financiare që shoqërojnë këtë pistë, Mikel Oyarzabal paraqitet si një alternativë shumë bindëse. Futbollisti i Real Sociedadit përputhet me kërkesat taktike të Flick, i cili synon një sulmues dinamik, të aftë të lëvizë në thellësi dhe të kombinojë me pjesën tjetër të skuadrës.

Avantazhi i sulmuesit nga San Sebastiani lidhet edhe me harmoninë që ai ka krijuar te kombëtarja e Spanjës. Oyarzabal gëzon raporte shumë të mira me disa nga figurat kryesore të dhomës së zhveshjes te Barcelona, si Lamine Yamal, Pedri, Gavi, Fermin Lopez, Dani Olmo dhe Ferran Torres. Në 40 paraqitje ai shënoi 18 gola, ndërsa kontrata e tij zgjat deri në vitin 2028.

Alternativa e tretë që po shqyrtohet vjen nga Liga Premier dhe mban emrin e Gabriel Jesus. Sulmuesi brazilian synon të largohet nga Arsenali, ndërsa klubi anglez dëshiron të përfitojë nga shitja e tij përfundimtare gjatë afatit kalimtar të verës.

Ndonëse është përballur me lëndime, karakteristikat e tij teknike kanë lënë përshtypje të mira te trajneri gjerman. Me një vlerësim që luhatet mes 20 dhe 30 milionë eurove dhe me kontratë deri në vitin 2027, ai e mbylli periudhën e fundit me 6 gola dhe 2 asistime në 27 ndeshje.

Ndërkaq, emri i katërt në listën e stafit teknik të Barcelonës është Fisnik Asllani. Përfaqësuesi i Kosovës sapo ka lënë pas një etapë pozitive në Bundesligën gjermane, ku luajti me Hoffenheimin.

Bilanci i tij në kampionatin e kaluar tregon peshë të konsiderueshme në lojë, me 11 gola dhe 10 asistime. Megjithëse ka kontratë deri në verën e vitit 2029, drejtuesit e klubit e konsiderojnë Asllanin vetëm si një alternativë dytësore në rotacion.

The post Barcelona vlerëson katër alternativa për pasuesin e Lewandowskit, mes tyre edhe Fisnik Asllani appeared first on Albeu.com.

Në një konferencë për shtyp, në nisje të përgatitjeve për sezonin e ri, mesfushori ofensiv u shpreh se nuk është në gjendje të premtojë se do të mbetet pjesë e klubit zviceran edhe pas kësaj vere.

“Është e mundur që të largohem nga Baseli gjatë këtij afati kalimtar”, deklaroi Shaqiri para mediave.

Sidoqoftë, 34-vjeçari sqaroi se një transferim nuk është përparësia e tij kryesore, ndërsa nënvizoi se ndihet mirë te klubi me të cilin ka edhe një vit kontratë.

“Në futboll, ashtu si në jetë, gjithçka është e mundur. Nuk ka kurrë siguri”.

Ai tha se do të vëzhgojë me kujdes zhvillimet te Baseli dhe mënyrën se si po formohet skuadra, duke theksuar se dëshiron një ekip cilësor që ta udhëheqë.

“Do të shoh me kujdes se çfarë po ndodh te Baseli. Do t’i kushtoj vëmendje mënyrës se si po ndërtohet ekipi. Dua një skuadër të mirë për ta udhëhequr”.

Fjalët e tij po interpretohen si një sinjal i qartë për drejtuesit e klubit, pas një edicioni zhgënjyes në krahasim me sezonin e kaluar, kur Baseli fitoi dy trofe.

“Po përpiqem të arrij rezultatet më të mira të mundshme. Edhe unë duhet të performoj, por për këtë më duhen edhe bashkëlojtarët”.

Në fund, Shaqiri tha se aktualisht është i qetë, i kënaqur te Baseli dhe se kontrata e tij me klubin vazhdon edhe për një vit.

“Jam shumë i relaksuar për momentin. Jam shumë i lumtur te Baseli dhe kam ende një vit kontratë këtu”, përfundoi ai.

Këto deklarata pritet të rrisin vëmendjen ndaj të ardhmes së tij, ndërsa mbetet për t’u parë nëse drejtuesit e Baselit do t’i përgjigjen kërkesës për një skuadër më konkurruese, apo nëse veterani do të vendosë të nisë një aventurë të re.

The post “Mund të ndodhë”, Xherdan Shaqiri lë të hapur mundësinë e largimit nga Baseli appeared first on Albeu.com.

Sipas ish-yllit të përfaqësueses, kjo skuadër i ka cilësitë e nevojshme për të avancuar nga faza e grupeve dhe pikërisht ky duhet të konsiderohet objektivi minimal i Zvicrës në këtë Botëror.

“Çdo gjë tjetër do të ishte me siguri një zhgënjim”, ka thënë Shaqiri.

Për herë të parë që prej vitit 2010, Zvicra po luan në një turne të madh pa Shaqirin, i cili u tërhoq nga kombëtarja pas Kampionatit Evropian 2024. Në karrierën e tij me përfaqësuesen, ai shënoi 32 gola me fanellën e Zvicrës.

Shaqiri foli edhe për ndjesinë e të ndjekurit të ndeshjes nga distanca, duke pranuar se për të ishte e pazakonshme të mos ishte pjesë e ekipit.

“Ishte sigurisht e çuditshme për mua, sepse zakonisht jam gjithmonë aty. Nga ana tjetër, isha në gjendje të shikoja gjithçka në qetësi dhe paqe, në rehatinë e shtëpisë sime, dhe ta analizoja të gjithën. Ishte gjithashtu mirë që kisha më pak presion përnjëherë dhe munda ta shikoja ndeshjen në divan. Dhe sigurisht, ishte shumë mirë t’i mbështesja”, thotë Shaqiri.

Ai bëri të ditur gjithashtu se FIFA e kishte ftuar për të qenë pjesë e ceremonisë hapëse të Kupës së Botës në SHBA, Kanada dhe Meksikë, por nuk kishte arritur të merrte pjesë.

“Kisha bërë të gjitha planet e mia. Do të kishte qenë vërtet interesante dhe fantastike të isha atje me të gjitha legjendat e FIFA-s dhe të shihja ceremoninë e hapjes. U thashë se mund të vija për finalen”, deklaroi ai.

Në përmbyllje, Shaqiri nënvizoi se arma kryesore e Zvicrës duhet të jetë fryma e grupit dhe loja si një ekip i bashkuar.

Sipas tij, vetëm nëse Zvicra paraqitet në fushë si një grup i unifikuar, mund të arrijë sukses.

The post Shaqiri: Kalimi i grupit është synimi më i ulët për Zvicrën në Botërorin 2026 appeared first on Albeu.com.