Edhe pse e ardhmja e tij te Besiktasi duket drejt fundit, 29-vjeçari mund të mbetet sërish në futbollin turk. Sipas mediave lokale, Kocaelispor ka shfaqur interes të qartë për reprezentuesin kosovar dhe ka nisur hapat e parë për t’u informuar mbi kushtet e një transferimi të mundshëm.

Sipas mediumit turk Çagdas, drejtuesit e Kocaelisporit kanë zhvilluar ditët e fundit një takim me menaxherin e Rashicës, ku janë diskutuar mundësitë dhe detajet e kalimit të tij.

Raportohet se Besiktasi kërkon afro 2 milionë euro për kartonin e lojtarit, por takimi i parë mes palëve nuk ka sjellë ende një marrëveshje konkrete.

Interesi për Rashicën, megjithatë, nuk vjen vetëm nga Turqia. Mediat turke bëjnë të ditur se menaxheri i tij është në bisedime edhe me disa skuadra të Bundesligës gjermane, çka mban të hapura disa alternativa për hapin e ardhshëm në karrierën e futbollistit.

Rashica nuk llogaritet në planet e Besiktasit për sezonin e ri, ndaj largimi i tij shihet si thuajse i pashmangshëm.

Kjo rrethanë ka shtuar aludimet për klubin e ardhshëm të kosovarit, i cili ka një eksperiencë të konsiderueshme në futbollin gjerman nga periudhat te Vitesse, Werder Bremen dhe Norwich City.

Tani mbetet për t’u parë nëse Kocaelispor do të arrijë të bindë si Besiktasin, ashtu edhe vetë lojtarin, apo nëse Rashica do të zgjedhë rikthimin në Bundesligë për të nisur një kapitull të ri në karrierën e tij.

The post Kocaelispor futet në garë për Milot Rashicën, largimi nga Besiktasi duket afër appeared first on Albeu.com.

Në njoftimin e publikuar, Fenerbahce bëri të ditur se është arritur marrëveshja si me Vedat Muriqin, ashtu edhe me klubin e tij, Mallorca, për kalimin e tij.

Klubi theksoi gjithashtu se Muriqi, sulmues i lindur në vitin 1994, ka vendosur firmën mbi një kontratë trevjeçare me Fenerbahcen.

Sipas komunikatës së klubit, në ceremoninë e nënshkrimit të zhvilluar në stadiumin Chobani, në Kompleksin Sportiv Fenerbahce Sukru Saracoglu, morën pjesë presidenti Aziz Yildirim, anëtarë të bordit dhe drejtori i futbollit, Oguz Çetin.

Menjëherë pas zyrtarizimit si lojtar i Fenerbahces, Muriqi shprehu mirënjohjen për besimin e marrë dhe u zotua para tifozëve se do të japë maksimumin.

“Falënderoj sinqerisht presidentin tonë, z. Oguz, trajnerin tonë të dashur Ismail Kartal dhe të gjithë tifozët e vyer të Fenerbahces që më konsideruan të denjë për këtë fanellë përsëri”.

“Mund të jeni të sigurt se nuk do të hezitoj kurrë të luftoj për këtë emblemë. Mund të them që tani e tutje se do të jem i denjë për këtë fanellë përsëri, si gjithmonë”.

“Shpresojmë që fundi i rrugës të jetë një kampionat”, ka deklaruar Muriqi pas zyrtarizimit.

The post Vedat Muriqi flet për herë të parë pas rikthimit te Fenerbahce appeared first on Albeu.com.

Klubi turk ka gjetur akordin me Vedat Muriqin, ndërsa sulmuesi pritet të mbërrijë sonte në mbrëmje në Stamboll.

Në njoftimin zyrtar, verdhëblutë bënë të ditur: “Klubi ynë ka arritur një marrëveshje parimore me Vedat Muriqin, i cili do të mbërrijë në Stamboll sonte në mbrëmje për t’iu nënshtruar një ekzaminimi mjekësor dhe për të finalizuar negociatat e transferimit”.

Më tej, Fenerbahce sqaroi edhe detajet e udhëtimit të futbollistit: “Aeroplani që transportonte Vedat Muriqin do të ulet në Terminalin Ndërkombëtar të Aeroportit Sabiha Gokçen në orën 21:00 të mbrëmjes”.

Njoftimi i klubit përfundonte me fjalët: “Ky informacion është dhënë për ndërgjegjësimin e publikut”.

Muriqi ka qenë pjesë e Fenerbahces edhe më herët për një sezon, periudhë në të cilën regjistroi 17 gola dhe shtatë asistime në 36 ndeshje.

The post Fenerbahce konfirmon afrimin e Vedat Muriqit appeared first on Albeu.com.

Pas përmbylljes së ristrukturimit në nivelet drejtuese, Fenerbahce ka shtuar ritmin në punën për afrimet e reja. Sipas TRT, emri i Muriqit vazhdon të jetë në krye të listës për repartin ofensiv.

Edhe në afatin kalimtar të dimrit, 32-vjeçari kishte qenë një objektiv i klubit turk, por në atë periudhë nuk u arrit marrëveshje. Tani, me largimin e tij nga Mallorca, kthimi në Turqi shihet si më i mundshëm se asnjëherë më parë.

Raportimet nga Turqia bëjnë të ditur se Muriqi ka hedhur poshtë ofertat e NEOM dhe Orlando City, pasi përparësinë e ka rikthimi te Fenerbahce. Po ashtu, mësohet se verdheblutë kanë siguruar një marrëveshje paraprake si me futbollistin, ashtu edhe me klubin spanjoll.

Gjatë katër vjetëve e gjysmë te Mallorca, Muriqi kaloi periudhën më të suksesshme të karrierës. Vetëm në sezonin 2025/26, ai shënoi 23 gola në 37 ndeshje, duke u renditur mes sulmuesve më produktivë të kampionatit.

Në total, reprezentuesi i Kosovës realizoi 58 gola në 155 paraqitje me Mallorcën, duke lënë gjurmë të rëndësishme në historinë e klubit spanjoll.

The post Fenerbahce drejt rikthimit të Vedat Muriqit, pas refuzimit të dy ofertave të tjera appeared first on Albeu.com.